“ما بين سنة وسنة..”| #لينا_دياب

كِل حدا فينا آخر السّنة،بيعمُل جردة لكل اللّي عملو،وكلّ اللّي مرّ فيه،بمحاولة تيحصي أرباحه وخساراته.وعهالأساس بيصير يحطّ مخطّطات ليللّي بدّو يقوم فيه السّنة اللّي جايي،ويعلّق آمال عهالسّنة،وتمنيات إنها تكون سنةأحسن من اللّي قبلها.الطّموح والأمل لازم يكونوا موجودين بكل حدا فينا،والمفروض علينا نضل نحاول نوصل لكل اللّي بدنا  اياه.هيدا كلّو حلو  ومنيح،بس الغلط وقت اللّي منقطع وعود عارفين ما ممكن نقوم فيها،ومنحط حالنا واللي قبالنا بدائرة شك وإحباط معيّن،ومافي اسوأ من يللّي بيوعد وما بيوفي..لهيك، لازم نكون مرّات واقعيين أكتر شوي،ما بيمنع إنو نحاول،بس ما نعطي وعد إنو أكيد حيتحقّق،تما نفقد مصداقيّتنا..من جهة تانية،الإنسان القوي هوّي اللّي بخوض كلّ المعارك،بس الإنسان الشّجاع والحكيم،هوّي اللّي بيختار أيّ معارك يخوضها.وما بيتردّد يخوض معركة تيكسب حالو فيها،وبيتحمّل العواقب اللّي بتترتّب عهالموضوع!

ما بعرف شو حتحمل السّنة اللّي جايي لكل حدا فينا،بس بعرف شو مرّ معنا بالسّنة الماضية.وما بين سنة وسنة ما منقدر إلّا ما نعايد بعض..وأنا رح إسبق الكل، واتمنى الأفضل والأحسن،لإلنا كلنا،وإنّو السّنة اللّي جايي،تحمل كل شي بتتمناه قلوبنا،وبتوافق عليه عقولنا..وكل سنة وإنتوا بألف خير